كنت حاسة انى محتاجة اعرف معلومات كتير عن التربية، كان نفسى جدا ان ابنى يكون سوي نفسيا وميمرش بكل اللى مرينا بيه واحنا أطفال، وده كان حافز ليا علشان ابدأ الطريق ده، من 5 سنوات فبدأت ادرس مجموعة من الكورسات ” التربية الإيجابية، منتسوري، كورسات اكتر في التنمية الذاتية والتعافي” كل ده علشان نفسي أكون ام أفضل..

مع الدراسة كان بتزيد عصبيتي على ابنى وتعاملي معاه، وده خلاني افقد ثقتي في نفسى كأم ،

لحد ما درست hand in hand اللي خلاني اتعلم مجموعة من الأدوات المبنية على علم المخ والاعصاب، الأدوات ساعدتني انى افهم لغة المخ والتعامل مع مشاعر الأطفال وبالتالي افهم الاحتياجات اللى طفلي محتاجها.

بداية فهمي لطفلي 

طفلي كان محتاج مشاعر أساسية زى التقبل ، الاحتواء، الاشباع العاطفي، ولكن ضغوط الحياة بتمنع الأمهات انها توصل المشاعر دي للأطفال.

وهنا لما اتعلمت الخمس أدوات قدرت ببساطة اتواصل مع ابنى بصورة افضل ويكون في اشباع عاطفي ليه ولاحتياجاته ، وبالتالي العلاقة ما بينا بقت افضل.

سلاح التعامل 

مجموعة الأدوات هي أدوات بتخاطب المخ وبتشبع احتياجاته، فا لو طفلك شخصيته ضعيفة، ثقته في نفسه قليله، عصبي جدا، عنيد جدا، عنده مشاكل زى التبول اللاإرادي، التأتأة وغيرها.

كل ده بيدل على ان الطفل في احتياج شديد لتفريغ كم من المشاعر المؤذية اللى اتخزنت جواه.

استخدامك وممارستك للأدوات دي مع طفلك هيساعده انه يتعافى.